धादिङ
मध्य धादिङको सिद्धलेक गाउँपालिका वडा नं १ को आयोजनामा वडा भित्रका सडकहरु श्रमदानमार्फत भईरहेकाे सरसफाई कार्यक्रममा पूर्व मुख्यमन्त्री शालिकराम जमकट्टेल सहभागि हुनुभएकाे छ ।
शुक्रबार डुम्रे खोला प्रतिक्षालय चोकदेखि वडा कार्यालय सडक अन्तर्गत जलेश्वरी आ.वि. वाजगरादेखि वडा कार्यालय हुँदै डाँडा गाँउ सम्मको सडक र चक्रपथ सडक अन्तर्गत ठुलो खोला देखि पाउनेटार, कुमालटार बेलटार सडक श्रमदानमार्फत सफा गरिएको वडा अध्यक्ष पेमा वाङग्याल लामाले जानकारी दिनुभयो ।
शुक्रबारको सरसफाई कार्यक्रममा बागमती प्रदेशका पूर्वमुख्यमन्त्री जमकट्टेल, जिल्ला खेलकुद विकास समिति धादिङका अध्यक्ष प्रताप सिं तामाङ, माओवादी केन्द्र सिद्धलेक गाउँपालिका कमिटी समेत सहभागी भएका छन्को ।
कार्यक्रममा वडा नं १ का स्थानीय बासिन्दा, विभिन्न राजनीतिक दलका प्रतिनिधि, शिक्षक, नागरिक समाज, आमा समूह, युवा क्लब, टोल विकास समिति, स्वास्थ्य स्वयंसेविका पनि सहभागी भएका थिए ।
श्रमदान कार्यक्रममा पूर्वमुख्यमन्त्री जमकट्टेलले स्थानीय स्तरमा वडाले सुरु गरेको अभियान निकै सकारात्मक रहेको बताउनुभयो ।
उहाँले भन्नुभयो–“सरसफाई अभियानले समाजमा सहकार्य, एकता र विकासको आधार तयार गर्छ । यसप्रकारको अभियानले वडालाई नमूना बनाउन ठूलो सहयोग पुर्याउनेछ ।”
पूर्वमुख्यमन्त्री जमकट्टेलले निरन्तर श्रमदान कार्यक्रम संचालन गर्दै आएकोमा वडा अध्यक्ष पेमा वाङग्याल लामा र सम्पूर्ण स्थानीयलाई धन्यवाद दिनुहुँदै यस अभियानलाई अझै प्रभावकारी बनाउन सबैलाई आग्रह गर्नुभयो ।
वडाले निरन्तर साप्ताहिक रुपमा (हरेक शुक्रबार) संचालन गर्दै आएको र यो पाँचौ पटकको श्रमदान कार्यक्रम रहेको वडा अध्यक्ष लामाले बताउनुभयो ।
श्रमदानले वडा भित्र सरसफाई र एकता बढाउन योगदान गर्ने उहाँको भनाई छ ।अभियान मार्फत वडाको सार्वजनिक स्थानलाई सफा राख्न, स्थानीय स्वामित्वको भावना बढाउन र सहकार्यको सन्देश पनि दिने वडा अध्यक्ष लामाले बताउनुभयो ।
