काठमाडौं ।
नेकपा एमालेका स्थायी कमिटीका सदस्य एवं जनसंगठन समन्वयका प्रमुख भानुभक्त ढकालले योग्य र सक्षम व्यक्तिलाई उमेरको हद लगाएर नेतृत्वमा बन्धेज गर्न नहुने बताउनुभएको छ ।
अनेराववियु महिला विभागको आयोजना भएको तिज विशेष कार्यक्रममा बोल्दै ढकालले भदौको १९ गते देखि हुने पार्टीको दोस्रो विधान महाधिवेशनले यस विषयमा टुंगो लगाउने बताउनुभयो । ‘साउन ६ गते सकिएको केन्द्रीय कमिटीले पार्टीमा रहेको ७० वर्षे उमेर हद र दुई कार्यकालको प्रावधान हटाएको छ’ ढकालले भन्नुभयो ‘यी दुवै विषयलाई विधान महाधिवेशन अनुमोदन गर्दछ ।’
ढकालले देशको आवश्यकता,पार्टीको आवश्यकता र व्यक्तिको क्षमतालाई उमेरको बन्धेज लगाएर रोक्नु नहुने बताउनुभयो । उहाँले ७० वर्षे उमेर हद खुलाउँदा त्यस भन्दा मुनीको उमेर समुहले प्रतिपष्पर्धा गर्न नपाउने नभनिएकोले यसमा कसैले आपत्ती जनाउनु नुहने बताउनुभयो । ‘७० वर्षे उमेर हदा हटाउँदा त्यस भन्दा मुनीको उमेर समुहका कमरेडहरुले प्रतिष्पर्धा गर्न पाउदैनन् भनिएको होइन’ ढकालले भन्नुभयो ‘आत्मविश्वास र जनमत छ जस्तो लाग्छ भने सबैले प्रतिष्पर्धा गरे हुन्छ । ’
ढकालले विगतमा माओवादीसँग पार्टी एकता गरेर नेकपा बनाउँदा होस वा त्यसभन्दा पछि एमाले बिनाको नेपाल र केपी ओली बिनाको नेपाल बनाउने भनेर तम्सिनेहरु धेरै रहेको स्मरण गर्नुभयो । ‘जस जसले यो मनशाय राख्नुभयो त्यो गलत थियो । त्यो आम एमालेको धारणा थिएन’ ढकालले भन्नुभयो ‘यस्तो धारणा राख्नेहरु व्यक्तिगत स्वार्थमा केन्द्रित थिए । उनीहरु पार्टीको हित भन्दा व्यक्तिको हित चाहन्थे । उनीहरुका चाहना पुरा भएनन् र पुरा हुदैनन् पनि ।’
ढकालले अनेरास्ववियु संगठनका विषयमा निर्णय गर्न स्वतन्त्र भएको बताउनुभयो । उहाँले गण्डकी लगायत केही ठाउँमा भइरहेको विवादका विषयमा आफू जानकार रहेको,असन्त्ुष्ट रहेकाहरुसँग संवादमा रहेको पनि बताउनुभयो । उहाँले अखिलमा ३२ वर्षे उमेरको हद लगाएको कारण युवाहरुको नेतृत्व विकासका लागि भएको बताउनुभयो । ‘संगठनको हित हुने कुरा तपाइंहरुले छलफल गर्नुहोस । कतिपय कुरा हामीले भनेका भन्दा तपाईंह्रुले भनेकै सान्दर्भिक हुन सक्छन्’ ढकालले भन्नुभयो ‘यस्ता जायज कुरामा पार्टीले हस्तक्षेप गर्दैन । ’
