काठमाण्डौ
पूर्वराजावादीको आन्दोलनका क्रममा काठमाडौं तिनकुनेमा आगजनीमा परेर आगजनीमा परी एक पत्रकारको मृत्यु भएको छ ।
पूर्वराजावादी प्रदर्शनकारीले तीनकुनेस्थित एक घरमा तोडफोड गर्दै आगजनी गरेका थिए । सो क्रममा फोटो/भिडियो खिच्न पुगेका एभिन्यूज टेलिभिजनका सुरेश रजकको आगोले जलेर मृत्यु भएको हो । उनी चौथो तलामा पुगेर दृश्य लिइरहेका थिए ।
एभीन्युज टेलिभिजनका सञ्चालक भाष्करराज राजकर्णिकारले टीभीका लागि लाइभ गर्दागर्दै उनी आगोमा परेको बताए । ‘प्रहरीलाई पटकपटक फोन गर्दा पनि समन्वय हुन नसकेकाे राजकर्णीकारकाे भनाइ छ ।
‘हामी प्रदर्शनको भिडियो खिच्न सँगै घरमाथि चढेका थियौं । उनी छेउको चारतले घरमा थिए । हामी पाँचतले घरमा थियो,’ ह्वाइटखबर डटकमका सम्पादक विक्रम श्रेष्ठले भने, ‘ढुंगामुढा समेत हुन थालेपछि हामी भाग्यौं तर सुरेश निस्कन सकेनन् ।’
नेपाल प्रहरीका प्रवक्ता दिनेशकुमार आचार्यले आगलागी भएको चौथो तलामा पत्रकार रजकको शव भेटिएको पुष्टि गरे ।
काठमाडौंमा आज कथित राजावादी समूहको नाममा भएको अराजकतापूर्ण र हिंसात्मक प्रदर्शनका क्रममा समाचार संकलनमा रहेका सञ्चारकर्मीको ज्यान गएको तथा सञ्चारमाध्यममाथि आक्रमण भएको घटनाले प्रेस चौतारी नेपाललाई स्तब्ध बनाएको छ।
काठमाडौंको तीनकुने क्षेत्रमा प्रदर्शनकारीले हिंसात्मक ढंगले एक निजी भवनमा आगजनी गर्दा सोही भवनको माथिल्लो तलाबाट समाचार छायांकन गरिरहेका एभिन्यूज टेलिभिजनका पत्रकार सुरेश रजकको कार्यस्थलमै जलेर मृत्यु भएको छ।
त्यस्तै, प्रदर्शनकारीहरूले अन्नपूर्ण पोस्ट दैनिकमा आगजनी प्रयास, कान्तिपुर टेलिभिजनमा ढुंगामुढा प्रहार तथा हिमालय टेलिभिजनको गाडी तोडफोड गरेका छन्।
प्रेस चौतारी नेपालको प्रथम केन्द्रीय समिति बैठकले सो घटनाको कडा शब्दमा निन्दा र भर्त्सना गर्दै घटनामा संलग्न दोषीहरूमाथि कडा कानूनी कारबाही गर्न सरकारसँग जोडदार माग गरेको महासचिव हिरामान लामाले जारी गरेको विज्ञप्तिमा जनाइएको छ।
नेपाल पत्रकार महासंघका महासचिव राम प्रसाद दहालले प्रेस विज्ञप्ति मार्फत महासंघ लोकतन्त्र र प्रेसविरोधी क्रियाकलाप नदोहोऱ्याउन ध्यानाकर्षण गराउँदै यस प्रकारका हर्कत दोहोरिए त्यस विरुद्ध उत्रन वाध्य हुनेतर्फ सचेत गराएकाे छ ।
रजकको जलेर निधन भएको खबरले महासंघ स्तब्ध भएको छ। महासंघ यो अमानवीय घटनाको छानविन गरी दोषीमाथि कानुनी कारवाहीको माग समेत प्रेस विज्ञप्तिमा गरिएकाे छ ।
