धादिङ । 

धादिङको पहिचान, विकासका सम्भावना तथा विश्वका विभिन्न मुलुकमा रहेका धादिङवासीका अनुभव र योगदानलाई समेटेर तयार पारिएको पुस्तक ‘देश–परदेश’ विमोचन गरिएको छ। २४४ पृष्ठको उक्त पुस्तकमा धादिङको सामाजिक, सांस्कृतिक, ऐतिहासिक तथा आर्थिक अवस्थासँगै जिल्लाको विकास र अन्तर्राष्ट्रिय अनुभवका विविध पक्ष समेटिएका छन्।

४९ वटा विषयमा लेखिएका सामग्री समेटिएको पुस्तकलाई संघीय सांसद बोधनारायण श्रेष्ठ, अन्तर्राष्ट्रिय धादिङ समाजका अध्यक्ष राजन खकुराल, गैरआवासीय नेपाली संघ (एनआरएनए) नेपालका उपाध्यक्ष लोक दाहाल, संघीय सांसद गंगादेवी श्रेष्ठ र पूर्वमन्त्री रामनाथ अधिकारीले संयुक्त रूपमा विमोचन गरेका हुन्।

पुस्तकका सम्पादक रमेश अधिकारीका अनुसार ‘देश–परदेश’ मा धादिङको मौलिक पहिचान, जिल्लाको विकास र अन्तर्राष्ट्रिय क्षेत्रमा रहेका धादिङवासीले हासिल गरेका अनुभवलाई विशेष प्राथमिकता दिइएको छ। जिल्लाको भौगोलिक तथा ऐतिहासिक परिचय, लोकसंस्कृति, पर्यटन, साहित्यिक विकास र स्थानीय परम्परादेखि समसामयिक सामाजिक तथा आर्थिक विषयसम्मका सामग्री पुस्तकमा समेटिएका छन्।

पुस्तकमा संघीयता, वित्तीय विकेन्द्रीकरण, कृषिको सम्भावना, उद्यमशीलताका लागि वित्तीय पहुँच, बसाइँसराइको प्रभाव, ज्येष्ठ नागरिकको संरक्षण तथा दलित समुदायको सामाजिक–आर्थिक अवस्थालगायतका विषयमा पनि लेखहरू समावेश छन्। यी सामग्रीले धादिङको वर्तमान अवस्था, विकासका अवसर र आगामी दिनमा सामना गर्नुपर्ने चुनौतीबारे विमर्श गर्ने आधार प्रदान गरेका छन्।

त्यसैगरी, विश्वका विभिन्न मुलुकमा रहेका धादिङवासीले स्थापना गरेका संस्था, तिनको संस्थागत यात्रा, विदेशमा रहँदा भोगेका संघर्ष, अनुभव र सामाजिक योगदानका विषय पनि पुस्तकमा समेटिएका छन्। विदेशमा आर्जन गरेको ज्ञान, सीप, प्रविधि र दक्षतालाई जन्मभूमिको विकासमा उपयोग गर्न सकिने सम्भावनालाई पुस्तकले उजागर गरेको छ।

सम्पादक अधिकारीले पुस्तक तयार पार्ने क्रममा विश्वका दर्जनौँ मुलुकबाट प्राप्त लेख, रचना, संस्थागत प्रतिवेदन र व्यक्तिगत अनुभवलाई एकै ठाउँमा समेट्ने प्रयास गरिएको बताए। उनका अनुसार विभिन्न लेखकका विचार, अनुभव र लेखनशैलीलाई यथासम्भव मौलिक रूपमा प्रस्तुत गर्दै धादिङलाई विविध दृष्टिकोणबाट चिनाउने उद्देश्य राखिएको छ।

पुस्तकमा केही सामग्री विश्लेषणात्मक छन् भने केहीले संस्थागत गतिविधि र व्यक्तिगत अनुभवलाई प्रस्तुत गरेका छन्। यसले धादिङको सामाजिक यथार्थ बुझ्न, जिल्लाको विकासबारे छलफल गर्न तथा विदेशमा रहेका धादिङवासी र जन्मभूमिबीचको सम्बन्धलाई थप बलियो बनाउन सहयोग पुग्ने अपेक्षा गरिएको छ।

सम्पादकीय टोलीले पुस्तकमा समेटिएका सामग्रीको भाषिक तथा प्राविधिक शुद्धताका लागि सक्दो प्रयास गरिएको जनाएको छ। विभिन्न स्रोतबाट संकलित सामग्री भएकाले केही त्रुटि रहन सक्ने उल्लेख गर्दै टोलीले पाठकबाट प्राप्त हुने सुझावलाई आगामी संस्करणमा समेट्ने प्रतिबद्धतासमेत व्यक्त गरेको छ।

पुस्तक निर्माणका लागि समय, ज्ञान र अनुभव प्रदान गर्ने सम्पूर्ण लेखक, अनुसन्धानकर्ता तथा राष्ट्रिय समन्वय परिषद्का पदाधिकारीप्रति सम्पादक अधिकारीले आभार व्यक्त गरेका छन्।

‘देश–परदेश’ ले धादिङको पहिचानलाई राष्ट्रिय तथा अन्तर्राष्ट्रिय स्तरमा परिचित गराउन, जिल्लाको विकासका विषयमा बहस अघि बढाउन र विदेशमा रहेका नयाँ पुस्तालाई आफ्नो जन्मभूमिको इतिहास, संस्कृति र सामाजिक परिवेशसँग जोड्न महत्त्वपूर्ण भूमिका खेल्ने विश्वास लिइएको छ।