धादिङ ।
भदौ १० गते भोटेकोशीमा आएको विनाशकारी बाढीले त्रिशूली नदी आसपासमा मजदुरी गर्दै आएका बारा–पर्साका श्रमिकको बस्ने ठाउँ मात्रै बगाएन, उनीहरूको रोजगारी र घर फर्किने बाटोसमेत अनिश्चित बनाइदियो। ज्यान जोगाएर बाढीबाट उम्किएका उनीहरू अन्ततः धादिङबेँसी आइपुग्दा भने घर पुग्ने साधन नहुँदा अलपत्र परे।
नुवाकोटको त्रिशूली क्षेत्रमा मजदुरी गर्दै आएका बारा र पर्साका १३ तथा भारतका ३ गरी १६ जना श्रमिक भोटेकोशी बाढीपछि विस्थापित भएका थिए। बाढीले उनीहरू बस्दै आएको ठाउँ, खानेकुरा तथा दैनिक आवश्यकताका सामग्रीसमेत बगाएपछि उनीहरू सुरक्षित स्थान खोज्दै घर फर्किने क्रममा धादिङबेँसी आइपुगेका थिए।
आइतबार धादिङबेँसी आइपुगेका श्रमिकसँग घरसम्म पुग्ने न त पर्याप्त पैसा थियो, न सहज यातायातको व्यवस्था। बाढीको त्रास, विस्थापनको पीडा र लामो यात्राको थकानसँगै उनीहरू धादिङबेँसीमा अलपत्र परे।
त्यही अवस्थामा उनीहरूको अवस्थाबारे जानकारी पाएपछि नीलकण्ठ नगरपालिका–३ का वडाध्यक्ष राजकुमार श्रेष्ठले तत्काल पहल गरे। वडाध्यक्ष श्रेष्ठको अगुवाइमा श्रमिकहरूलाई गन्तव्यसम्म पुर्याउन माइक्रोबस रिजर्भ गरियो। यात्राका लागि आवश्यक खानेकुरासमेतको व्यवस्था गरेर उनीहरूलाई सुरक्षित रूपमा घरतर्फ पठाइएको हो।
त्रिशूलीबाट सामरी भञ्ज्याङ र धुवाँकोट हुँदै धादिङबेँसी आइपुगेका उनीहरूलाई गोरखा, आबुखैरेनी र मुग्लिन हुँदै नारायणघाटसम्म पुर्याउने व्यवस्था मिलाइएको थियो। त्यहाँबाट उनीहरूलाई आ–आफ्नो गन्तव्यतर्फ जान सहज हुने गरी पठाइएको वडाध्यक्ष श्रेष्ठले बताए।
‘बाढीबाट ज्यान जोगाएर आएका उनीहरू यहाँ आएर पनि अलपत्र परेको थाहा पाएपछि सकेको सहयोग गरेर घर पठाउने व्यवस्था मिलाएका हौँ,’ वडाध्यक्ष श्रेष्ठले भने, ‘विपद्को समयमा समस्यामा परेका नागरिकलाई सुरक्षित गन्तव्यसम्म पुर्याउनु हाम्रो मानवीय दायित्व हो।’
बाढीले सबैथोक गुमाएर घर फर्किन बाध्य भएका श्रमिकका लागि धादिङबेँसीमा गरिएको यो सहयोग केवल यातायातको व्यवस्था मात्रै थिएन। लामो समयदेखि परिवारबाट टाढा रहेर मजदुरी गरिरहेका उनीहरूका लागि विपद्को बीचमा सुरक्षित घर फर्किने भरोसा पनि थियो।
घर फर्किने क्रममा धादिङबेँसीमा अलपत्र परेका श्रमिकलाई गाडी रिजर्भ गरेर खानेकुरासहित सुरक्षित गन्तव्यतर्फ पठाएपछि स्थानीयवासीले वडाध्यक्ष श्रेष्ठ र वडा कार्यालयको मानवीय पहलको प्रशंसा गरेका छन्।
विपद्ले सीमाना, जिल्ला र नागरिकको पहिचान नहेर्ने अवस्थामा मानवीय सहयोग पनि त्यही सीमाभन्दा माथि हुनुपर्ने सन्देश यस घटनाले दिएको छ।
नीलकण्ठ नगरपालिकाले बिपदमा परेकाहरुका लागि खाने बस्ने व्यवस्था गरेकाे छ ।
