धाादिङ ।
नीलकण्ठ नगर खानेपानी तथा सरसफाई बोर्डको अध्यक्षमा शिव प्रसाद अधिकारी नियुक्त हुनुभएको छ। नीलकण्ठ नगर खानेपानी तथा सरसफाई बोर्डका पदाधिकारीहरुलाई नीलकण्ठ नगरपालिकाका प्रमुख भीम ढुंगानाले पद तथा गोपनियताको सपथ ग्रहण गराउनुभएकाे छ ।
बोर्डका सदस्यहरुमा कार्यपालिकाको निर्णय अनुसार वडा नम्बर ३ का वडा अध्यक्ष राजकुमार श्रेष्ठ, वडा नम्बर ८ का वडा अध्यक्ष एवं प्रवक्ता प्रकाश कुमार श्रेष्ठ, वडा नम्बर १२ का वडा अध्यक्ष धर्मराज भण्डारी (राजकुमार), वडा नम्बर १४ का वडा अध्यक्ष नबराज दुवाडी रहेका छन् । यसैगरी सदस्यहरुमा भगवती उप्रेती, कृष्ण प्रसाद कोइराला, मन्जु मगर, दयाराम लम्साल, राजाराम रिजाल निर्देशकमा शिव राना रहेका छन् ।
त्यस्तै, मनोनित सदस्यहरुमा विज्ञ सदस्य डाक्टर कृष्णमान शाक्य, महिला सदस्य कोपिला खान ठकुरी, नमिता थापा अधिकारी तथा सदस्य राजकुमार श्रेष्ठ रहेका छन् । सपथ ग्रहण गर्दै बोर्डका अध्यक्ष शिव प्रसाद अधिकारीले नीलकण्ठ नगरपालिकाको तिर्खामूक्त शहर बनाउने परिकल्पना पुरा गर्ने गरि काम गर्ने बताएका छन् ।
कार्यक्रमको सम्बोधन गर्दै नीलकण्ठ नगरको समृद्धि र दिगो विकासका लागि खानेपानी र सरसफाइ महत्वपूर्ण आधार अनुसार काम गर्न पदाधिकारीहरुलाई आग्रह गरे । कार्यक्रमकै अवसरमा बागमती प्रदेशका आन्तरिक मामिला तथा कानुन मन्त्री शिवराज अधिकारीलाई सम्मान गरिएको छ । नीलकण्ठ नगरपालिकाले प्रमाणपत्र र दोसल्ला ओढाएर मन्त्री अधिकारीलाई सम्मान गरेको हो । कार्यक्रमलाई सम्बोधन गर्दै मन्त्री अधिकारीले निष्ठाको राजनीति गरेर जनताको पक्षमा काम गर्ने बताए ।
