धादिङ ।
गजुरी गाउँपालिकाकाे गाउँ सभा सदस्यमाथी अपमानित हुनेगरि बजेट सम्साेधन गरि राताे किताव प्रकाशन गरिएकाेमा गाउँ पालिका उपाध्यक्ष शर्मिला बिसुरालले आपत्ति जनाउनुभएकाे छ । गाउँ पालिकाले प्रकाशन गरेकाे राताे कितावका सम्बन्धमा गाउँ पालिका उपाध्यक्ष बिसुरालले प्रेस विज्ञप्ति प्रकाशन गरेर आपत्ति जनाउनुभएकाे हाे ।
गत १० असारमा गाउँसभामार्फत ल्याइएको बजेटभन्दा बेग्लै शीर्षक र योजनाहरू थपेर गाउँपालिकाको बजेट किताब छापिएको भन्दै गाउँपालिका उपाध्यक्ष बिसुरालले विरोध जनाउनुभएकाे छ ।
गाउँपालिकाकी उपाध्यक्ष विसुरालले चालु आर्थिक वर्ष २०८२/८३ को बजेट पुस्तकमा प्रस्तुत रकम र गाउँसभामा पारित रकमबीच फरक देखिएको भन्दै आपत्ति जनाएकी छन् ।
मिति २०८२ असार १० गते सम्पन्न १६ औं गाउँसभाबाट ६७ करोड २२ लाख ९२ हजार रुपैयाँको बजेट पारित भए पनि, बजेट पुस्तक छाप्ने क्रममा करिब ३ करोड ७ लाख रुपैयाँ थप गरी ७० करोड २९ लाख २ हजार ८ सय बनाइएको विसुरालको प्रेस विज्ञप्तिमा उल्लेख छ।
गाउँसभा सदस्यलाई जानकारी नै नदिई अध्यक्ष र प्रमुख प्रशासकीय अधिकृतको सहमतिमा बजेट रकम परिवर्तन गरिएको हो ।
उपाध्यक्ष विसुरालले गाउँसभामा प्रस्तुत तथ्याङ्क परिवर्तन गर्नु कार्यपालिका बैठक वा कुनै व्यक्ति विशेषको अधिकार नभएको उल्लेख गर्दै यो कदमलाई “गाउँसभा सदस्यको अपमान” भएको बताउनुभयाे । साथै, आफ्नै सहमति बिना बजेट पुस्तकमा हस्ताक्षर प्रयोग गरी शुभकामना सन्देश प्रकाशित गरिएको आरोप पनि बिसुरालकाे छ ।
“राजनीतिक आस्थाका कारण महिला जनप्रतिनिधिलाई अपमान र असहयोग गर्ने प्रवृत्ति बढिरहेको छ, जुन आम महिला समुदाय र गजुरीवासी जनताप्रति अन्याय हो,” विसुरालले विज्ञप्तिमा उल्लेख छ ।
वडाअध्यक्षसँग छलफल गर्नुका साथै उपाध्यक्षलाई जानकारी दिएरै ६७ करोडबाट बजेट ७० करोड बनाएको स्वीकार गर्दै अध्यक्ष गणेशलाल श्रेष्ठले संघ र प्रदेशबाट आउने बजेट असारको अन्तिममा आउने र अघिल्लो वर्षहरूमा जस्तै यसवर्ष पनि अल्या गरेर बजेट थप गरी किताब प्रकाशित गरिएको बताउनुभयाे ।
उपाध्यक्षलाई गाउँपालिकाबाट पर्याप्त सेवा-सुविधा दिइरहे पनि पटकपटक अध्यक्षको विरोध गरिरहेको आरोपसमेत श्रेष्ठको छ ।
गजुरी गाउँपालिकामा अध्यक्ष नेकपा माओवादी केन्द्रबाट निर्वाचित हुन् भने उपाध्यक्ष नेपाली कांग्रेसकी हुन् । यो पालिकामा कांग्रेस र माओवादीको गठबन्धन भएको थियो ।
गत १९ साउनमा अध्यक्ष श्रेष्ठले विदेश गएका बेला आफू निकटका वडाध्यक्षलाई कार्यवाहक अध्यक्ष दिएपछि विवाद चर्किएको थियो ।
