धादिङ।
शिक्षक सरुवा र विद्यालय समायोजनको विषयमा समाचार लेखेको भन्दै सिद्धलेक गाउँपालिका अध्यक्ष परशुराम खतिवडाले दुईजना पत्रकार धम्की दिएका छन् ।
२०८२ भदौ ४ गते नेपाल पत्रकार महासंघ केन्द्रीय प्रतिनिधि, धादिङ न्यूज डटकमका प्रधान सम्पादक केशव अधिकारी र नेपाल पत्रकार महासंघ धादिङका सदस्य एवं वागमती कलम डटकमका प्रधान सम्पादक अनिल कुमार नेपालीमाथी सिद्धलेक गाउँपालिका अध्यक्ष खतिवडाले गाउँपालिका प्रहरी लगाएर कार्यकक्षमा उपस्थित गराइ धम्की दिएको पत्रकार अधिकारीले बताउनुभयो । यसैगरि नेपालीलाई समेत टेलिफोन गरेर धम्की दिएका थिए ।
२०८२ साउन २९ गते बिहीबार बसेको सिद्धलेक गाउँपालिकाको शिक्षा समितिको बैठकको निर्णय अनुसार गाउँपालिकाका शिक्षक सरुवा र विद्यालय समायोजन गरिएको बिषयमा लेखिएको विषयमा अधिकारी र नेपालीलीले धादिङन्यूज डटकममा ०८२ भदौ ३ गते सिद्धलेकको ९ वटा बिद्यालय वन्द गरिने शिर्षकमा समाचार प्रकाशित गरेको थियो भने वागमती कलमले सोही दिन सिद्धलेकमा ९ वटा विद्यालयको समायोजन ः २८ जना शिक्षकको सरुवासंगै विद्यालय वर्गिकरण शिर्षकमा समाचार प्रकाशित गरेको थियो । गाउँपालिकाको वेभसाईटमा राखिएको सूचनालाई आधार मानेर लेखिएको सो समाचारको बिषयलाई लिएर पालिकाका अध्यक्षबाट पत्रकारहरु माथि गरिएको दुरव्यवहारलाई नेपाल पत्रकार महासंघ धादिङले आपत्ति जनाएको छ ।
समाचारको विषयमा चित्त नबुझे खण्डन गर्ने, प्रेस काउन्सीलमा उजुरी गर्ने, वा अदालतमार्फत कानूनी उपचारको न्यायिक बाटो हुँदाहुँदै स्थापित संविधान कानुन , मूल्य, मान्यता, विधि र प्रक्रिया विपरीत गाउँपालिका अध्यक्षले गाउँपालिका प्रहरी लगाएर कार्यकक्षमा बोलाएको र धम्कीदिएको घटना निन्दनीय भएकोले सार्वजनिक रुपमा माफी माग्न नेपाल पत्रकार महासंघले आग्रह गरेको छ ।
पत्रकारलाई गरिएको धम्की र दुरव्यवहार प्रति प्रेस चौतचारी नेपाल जिल्ला शाखा धादिङ, नेपाल पत्रकार महासंघ केन्द्रीय कार्यालय र नेपाल पत्रकार महासंघ बागमति प्रदेश कार्यालयले छुट्टाछुट्टै प्रेस विज्ञप्ती निकालेर विरोध गर्दै यस्ताखाले हर्कत स्थानीय सरकारबाट नगर्न माग गरिएको छ ।
