पृथ्वी राजमार्गको गजुरी गाउँपालिका–६, जहरे खेतमा शुक्रबार बिहान करिब ६:२० बजे माथिबाट रुखसहित आएको पहिरोका कारण सडक दुबै तर्फ अवरुद्ध भएको छ। घटनापछि पहिरो पन्छाउने उपकरणसहित सुरक्षाकर्मीहरू परिचालन गरिएको जिल्ला प्रहरी कार्यालय धादिङले जनाएको छ।

उक्त स्थानमा सडक पूर्णरूपमा बन्द हुँदा दुईतर्फी सवारी साधन रोकिएका छन्। पहिरो ठूलो मात्रामा आएको र रुख ढलेर सडक छेकिएको कारण सफाइमा केही समय लाग्ने अनुमान गरिएको छ।

यसैबीच, थाक्रे गाउँपालिका–७, सातकिलोमा पनि पहिरो खस्दा यातायात एकतर्फी मात्र सञ्चालनमा रहेको प्रहरीले जनाएको छ। लगातारको वर्षासँगै राजमार्गका विभिन्न स्थानमा पहिरो खस्ने जोखिम उच्च रहेकाले सतर्क रहन चालक र यात्रुलाई आग्रह गरिएको छ।