धादिङ ।
सदियौँदेखि चलेको कुसंस्कार र सामन्तवादी अवेश विरुद्ध विवाहित छोरीहरुले गरेको विद्रोहलाई नेकपा एमाले धादिङले ऐक्यवद्धता जाहेर गरेको छ । नेकपा एमाले जिल्ला कमिटि धादिङका अध्यष भूमि त्रिपाठीले हस्ताक्षर गरि प्रकाशन गर्नुभएको विज्ञप्तीमा नेपाली समाजको साँस्कृतिक र धार्मिक प्रथाहरु पितृसत्ताको नियन्त्रणमा बनेका र सामन्तबादी मानसिकतामा संस्कार नामको जडको आडम्बरमा बाँधेर महिलाको आत्मसम्मान, स्वतन्त्रता र पहिचान माथि कन्जा जमाउदै आउनु र त्यसलाईं परम्पराको नाममा अगाडी लैजाने कार्य स्वीकार्य नभएको उल्लेख गरिएको छ ।
नेकपा एमाले जिल्ला कमिटी धादिड सचिव राधिका सापकोटा, बनेपा नगरपालिका उप प्रमुख एवं अखिल नेपाल महिला संघ काभ्रेका अध्यक्ष बिमला सापकोटा, बौद्धिक परिषद काभ्रेका कोषाध्यक्ष निर्मला सापकोटा, दिदीहरु सुन्तली सापकोटा र कमला सापकोटाको बुबा इरि प्रसाद सापकोटाको यहि साउन २५ गते मृत्यु भएकोले मृतकप्रति श्रद्धाञ्जली अर्पाण गर्दै प्रेस विज्ञप्तीमा महिला आन्दोलनका अब्बल नेता विमला, राधिका र निर्मला क्रान्तिका नायकको संज्ञा दिँदैँ हजारौंँ वर्षंदेखि जरा गाडेको सामन्तवादी पुरुषसत्ताको अघोषित नीति र प्रथा विरुद्ध धावा बोलेकोमा एमालेले विद्रोहप्रति ऐक्यवद्धता जनाएको हो ।
छोरीहरुले काजक्रिया गर्न हुन्न भन्ने परम्परालाईं तोड्दै विमला, निर्मला र राधिकाले गरेको काजक्रियालाई एमाले धादिङले उच्च सम्मान प्रकट गरेको छ ।
वि.सं. १९९३ असोज ३ गते जन्मनु भएका हरि प्रसाद सापकोटा काभ्रे जिल्लाको पनौती नगरपालिका वडा नम्बर १ (तत्कालिन रयाले गाविस) का अगुवा तथा सेल्टरदाताको रुपमा अविचलित रहनुभएको थियो । २०५३ सालमा श्रीमतिको मृत्युभएपछि गाउँबासीले हरि प्रसादलाई छोरा नभएको भनेर गरेको हेलाँ दुरव्यवहार विरुद्ध छोरीहरुलाई समाज परिवर्तनको अभियानमा लगाएर आमा र बाबु दुबैको कर्तव्य निभाउँदै आउनुभएको थियो ।
अहिले छोरीहरु राधिका, विमला र निर्मला काजक्रियामा बस्नुभएको छ भने स्वस्थ्यका कारण सुन्तली र कमलाले बहिनीहरुलाई सघाउनुभएको छ ।
पुरातन सामन्तवादी सोचका केही बुज्रुकहरुले छोरीले काजक्रिया गर्न हुन्न भनेर बहिस्कारको धम्की दिएपनि यसको पर्वाह नगरि आफ्नो बुबाको काजक्रिया छोरीहरुले गर्न पाउनुपर्छ भनेर बसेको निर्मला सापकोटाले बताउनुभएको छ ।
सामाजिक बहिस्कारको धम्कीपछि सापकोटा परिवारप्रति ऐक्यवद्धता जनाउनेहरुको भिड लागेको छ भने एमाले सहितका केन्द्रीय नेता तथा संचारकर्मीहरु रयाले पुगेका छन् ।
