धादिङ ।
उत्तरी धादिङमा तामाङ समुदायको मौलिक संस्कृति, भेषभूषा, रहनसहन र परम्परा झल्काउने म्हेन्दोमाया दोहोरी गीतको चौथो संस्करणको प्रतियोगिता सम्पन्न भएको छ ।
धादिङ, नुवाकोट र रसुवाको संगमस्थल तथा धार्मिक, सांस्कृतिक र पर्यटकीय महत्व बोकेको सिङ्ल्हा म्हाने क्षेत्रमा जनैपूर्णिमाको अवसरमा लाग्ने झाँक्री मेलासँगै जम्बुलिङ फिल्म्स प्रा.लि.को आयोजनामा उक्त प्रतियोगिता सम्पन्न गरिएको हो ।
कार्यक्रममा प्रमुख अतिथि रुबीभ्याली गाउँपालिकाका अध्यक्ष रामसिंह तामाङले भने, “यस किसिमका प्रतियोगिताले हाम्रो मौलिक संस्कृति र परम्परालाई संरक्षण गर्दै नयाँ पुस्तामा प्रेरणा जगाउँछ । स्थानीय पर्यटन प्रवर्द्धनमा पनि यसको ठूलो योगदान हुन्छ ।”
आयोजक जम्बुलिङ फिल्म्स प्रा.लि.का अध्यक्ष राजकिङ वाइबाले भने, “म्हेन्दोमाया हाम्रो पहिचान हो । यसलाई निरन्तरता दिन र प्रतिभालाई अवसर दिन यो प्रतियोगिता नियमित गर्दै आएका छौं ।”
प्रतियोगितामा चर्चित म्हेन्दोमाया कलाकारहरूको समेत उपस्थिति थियो । प्रतियोगितामा साल्मे ए किस्पाङ विजेता र साल्मे बी किस्पाङ उपविजेता बनेका छन् ।
